مش عارف اقول اية ولا اعيد اية

مش عارف اقول اية ولا اعيد اية
احنا فعلا شعب ما يتمرش فية والحكومة باعت علينا حتى حلتها المخرومة والبالطو القديم المرقع واحنا ما فيش فايدة فينا ؟ أكل ومرعة وقلة صنعة ؟

اشتكينا من البطالة الحكومة بنت لينا قهاوى وغرز لغاية ما بقت ( وما الدنيا الا مقهى كبير ) وبقت غرزة لكل مواطن واحنا بردو لسانا زالف ما فيش فايدة ؟
اشتكينا من ازمة المساكن الحكومة بنت لينا مقابر فايف ستار وقالت لنا ( اعمل لآخرتك كأنك تموت غدا ) ( والآخرة خير وأبقى ) واحنا ما فيش فايدة عاوزين نكوش على الدنيا والآخرة ؟ ما شفتش طمع زى دة ؟

اشتكينا من ازمة المواصلات جابت لنا التوك توك يوصلنا لحد بيوتنا وانت ونصيبك بقى يا توصل سليم يا توصل ............ وبردو ما فيش فايدة قال اية ؟ التوك توك صغير عايزين حاجة اكبر من كدة ؟ شفت قنزحة اكتر من كدة فعلا احنا شعب اقرع ونزهى

اشتكينا من قلة العيش جابت لنا العيش الطباقى والعيش الابيض والاحمر والاخضر وعلى كل لون يا عيش ومش بس كدة اضافت الى العيش كل الاضافات التى من شأنها تزود الصحة وتطول العمر من صراصير لزوم البروتين ومسامير لزوم الحديد والزرنيخ واعقاب السجاير علشان تتكيف بعد الاكل .
وممكن أحياناً العانس تلاقى فران سيما وقيمه طالع لها من رغيف العيش

لكن بردو ما فيش فايدة ال اية الواحد علشان يطول رغيف عيش يقف فى طوابير ايام وليالى ؟ عمركم شفتم دلع واستنطاع اكتر من كدة ؟ طيب يا صايع منك لة ما الطوابير ليها فايدة بردو واوعوا تكونوا فاكرين الحكومة مش قاصداها لا قصداها ونص وتلت اربع ؟
الطوابير ليها سبع فوائد بس اللى يفهم بقى
دى رياضة يا نماردة يا تنابله الوقوف والدفع والخبط والزغد بتقوى العضلات وتجرى الدم ( على الرصيف طبعا ) وبعدين انتم وراكم الديوان يعنى اهوه الحكومة بتسليكم بدل ما انتم ملطعين على القهاوى والغرز وبعدين ليها فائدة اجتماعية مهمة جدا فانا اعرف ان هناك اربع حالات زواج حصلت فى طوابير العيش اتجوزوا وخلفوا وهما واقفين فى الطابور والعيال قربت تروح المدرسة كمان .
شفتم الحكومة حلت مشكلة العنوسة ازاى ؟

وانا شايف ان طالما الشعب دة ما فيش منة فايدة وهايفضل كدة كل ما تديلة لقمة يطلب غموس تديلة غموس يطلب يحلى تديلة يحلى يطلب كباية شاى علشان يعمر الطاسة ...... الخ
انا شايف ان الحكومة تنفض لنا وتحلق لنا وتسيبنا نهاتى وتدور لها على عقد عمل فى دولة بترولية وتسيبنا نخبط فى بعض ونشوف مين بقى هايأكلنا ويسكننا ويجوزنا ويلعبنا رياضة ويلعبنا على الشناكل كمان

عارفه بقى انا عاوزه اقول ايه
حسبى الله ونعم الوكيل فيكى يا حكومه
وفعلا يانور قدرتى تقدمى مشاكلنا بصوره حلوه
ونقد كوميدى راااائع
سلمتى

ميرسى خالص
بس بالراحة شوية إنتى عاوزانا نتقابل فى أبو غريب
وعلى فكرة الموضوع منقول

ههههههههههههههه
شكرا ليكى يا نر القمر على الموضوع الحلو دة
انا طول عمرى بقول ان العيب من الشعب
مالها الحكومة يعنى

أنا أعرف يا ختى
ده إحنا شعب ظالم وجبار
أنا أعرف الحكومة دى يا حبة عينى متسحملانا إزاى
هههههههههههههههه
منورة يا برنسيس

شكرا ليكى نور القمر
على اهتمامك بالحكومه الغلبانه
والشعب الجبار وحسبى الله ونعم الوكيل

ههههههه
العفو يا جنة
أنا بس ببين قد إيه إحنا ظالمين
يمكن نتصلح

ههههههههههههههه
موضوع في غاية الروعة يا نور القمر
بجد طرحتي المشاكل في شكل لطيف جدا
شكرا ليكي علي الموضوع

شكراا ليكى موضوع جميل ويتناول مشكلة حقيقية شكراا مره ثانية للمواضيع الروعه

» اعرف لانك مش عارف
» مش هتصدق عنيك عارف مين اللى على اليسار ده
» عارف طيب مستني ايه ........موضوع مهم جدا الكل لازم
» عارف امتى هتصعب عليك نفسك......؟