يا شعبي حبيبي يا روحي يا بيبي يا حاطك في جيبي يا ابن الحلال
يا شعبي يا شاطر يا جابر خواطر يا ساكن مقابر وصابر وعال
يا واكل سمومك يا بايع هدومك يا حامل همومك وشايل جبال
يا شعبي اللي نايم وسارح وهايم وفي الفقر عايم وحاله ده حال
أحبك محشش مفرفش مطنش ودايخ مدوخ وآخر انسطال ...
أحبك مكبر دماغك مخدر ممشي أمورك كده ...باتكال
وأحب اللي ينصب وأحب اللي يكدب وأحب اللي ينهب ويسرق تلال
وأحب اللي شايف وعارف وخايف وبالع لسانه وكاتم ما قال
وأحب اللي قافل عيونه المغفل وأحب البهايم وأحب البغال
وأحب اللي راضي وأحب اللي فاضي وأحب اللي عايز يربي العيال
وأحب اللي يائس وأحب اللي بائس وأحب اللي محبط وشايفه محال
وأحبك تسافر وتبعد تهاجر وتبعت فلوسك دولار أو ريال
وأحبك تطبل تهلل تهبل عشان ماطش كوره و فيلم و مقال
وأحبك تأيد تعضض تمجد توافق تنافق وتلحس نعال
تشم النشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تغير وعايز تطور وتعمللي روحك مفرد رجال
ساعتها حجيبك لا يمكن أسيبك وراح تبقى عبرة وتصبح مثال
حبهدل جنابك وأذل اللي جابك و هيكون عذابك فوق أي إحتمال
وامرمط سعادتك واهزأ سيادتك واخلي كرامتك في حالة هزال
وتلبس قضية وتصبح رزية وباقي حياتك تعيش في إنعزال
هتقبل هحبك هترفض هلبك هتطلع هتنزل هجيبلك جمال
الرئيسية 
البوابة 
أحدث الصور 
التسجيل 
دخول 
تسجيل دخول الاعضاء 
الأربعاء يونيو 02, 2010 12:01 pm
